Пӳртшӗн е хваттершӗн ӳлемрен кадастр хакне кура налук тӳлеме тытӑнӑпӑр.
Теприсем асӑрханӑ тӑрӑх кадастр хакӗ ытла та пысӑк, ҫавна кура налукшӑн кӗсьене самай ҫӳхетме тивӗ. Росреестрӑн Чӑваш Енри управленийӗ кадастр хакӗпе тата налукпа ҫыхӑннӑ ыйтусене уҫӑмлатма акци ирттерессине пӗлтерет. Хак тивӗҫтермесен ӑна епле улӑштармаллине те ӑнлантарса парӗҫ.
Специалистсем ҫу уйӑхӗн 26-мӗшӗнче ҫынсене РФ Президенчӗн Чӑваш Енри йышӑну пӳлӗмӗнче 14 сехетрен пуҫласа 16 сехетчен кӗтӗҫ. Йышӑну пӳлӗмӗ — Шупашкарти Ленинград урамӗнчи 36-мӗш ҫуртри (унта нумай ӗҫ тӑвакан центр вырнаҫнӑ) 2-мӗш хутра. Хӑвӑрпа пӗрле куҫман пурлӑх пирки калакан хутсене илме сӗнеҫҫӗ. Йышӑнӑва 62-22-33 номерпе шӑнкӑравласа ҫырӑнмалла.
Росреестрӑн Чӑваш Енри управленийӗ пӗлтернӗ тӑрӑх, Тӑван ҫӗршывӑн вӑрҫин ветеранӗсен ыйтӑвӗсене кӗске вӑхӑтрах пӑхса тухӗҫ.
Патшалӑх кадастр утчетне тӑратма ыйтса ҫырнисене пӑхса тухассине 3 кунта ӗлкӗрме шантараҫҫӗ. Куҫман пурлӑхӑн патшалӑх кадастрӗнчи хыпара пӗлес текенсен ыйтӑвне 1 кунтах тивӗҫтересшӗн. Кӗскетнӗ вӑхӑтпа пӑхса тухас ыйту ҫулталӑк вӗҫленичченех, кӑҫалхи раштавӑш 31-мӗшӗччен, пымалла.
Росреестр ӗҫченӗсем вӑрҫӑ ветеранӗсем патне киле ҫитсе пулӑшассине те малалла тӑсаҫҫӗ. Чӗнсе илес тесен 8(8352) 45-25-17, 43-96-64 номерпе шӑнкӑравламалла та икӗ еншӗн те меллӗ вӑхӑт пирки калаҫса татӑлмалла.
Тӑван ҫӗршывӑн аслӑ вӑрҫин ветеранӗ пулнине ӗнентерме специалистсем удостоверени ыйтӗҫ.
Пӗр-пӗр пурлӑха патшалӑх регистрацийӗ тутарнине ӗнентерекен хутсем кӑҫалтан тӗрлӗ тӗслӗ пулма пӑрахӗҫ. Иртнӗ ҫул вӗҫӗнче вӗсене урӑхларах ҫирӗплетнӗ. Ҫав хута Росреестрӑн официаллӑ бланкӗ ҫинче пичетлӗҫ, унта ҫӗршыв гербне вырнаҫтарнӑ.
«2015 ҫулта тӗрлӗ тӗслӗ хутлӑ свидетельствӑсем пама пӑрахӑпӑр. Ун пеккисем иртнӗ вӑхӑта тӑрса юлӗҫ, — тенӗ Росреестрӑн Чӑваш Енти управленийӗн ертӳҫи Екатерина Карпеева. — Куҫман пурлӑха патшалӑх регистрацийӗ тума ыйтса ҫырнӑ, анчах хутне илсе ӗлкӗрейменнисене вӑл тӗрлӗ тӗслиех лекӗ. Ҫӗнӗрен регистрацилекенсене Росреестрӑн бланкӗ ҫине ҫырса парӑпӑр».
+6.3 °C